Aqueles Ollos recrea a atmosfera das películas dirixidas por Wong Kar Wai, onde sutís historias de amor contido e anhelo transcorren baixo as frías luces de neón da noite de Hong Kong.

Estes contrastes reflíctense na elección de materiais desta colección, onde conviven delicadas organzas e brocados de seda cunha experimentación material propia inspirada polo uso innovador da cámara, a iluminación e o coidado tratamento da cor do director.

As prendas estruturadas do proxecto xeran volumes que se afastan do corpo, creando unha coraza que transforma a aparencia dos personaxes e lles permite transitar un mundo sutil e enigmático, onde os silencios falan por si mesmos.