Este proxecto explora a figura do monstruo como estratexia formal e discursiva na moda. Desenvolvido dende a experimentación material con impresión 3D, sublimación e técnicas de ready-made, propón novas formas de construción téxtil e siluetas non convencionais. A colección resultante cuestiona os límites normativos do belo e do funcional a través dunha estética baseada na mutación, a fragmentación e o inacabado. Influencias como o cinema de terror dos anos 80, a arte pop, Alexander McQueen e Rei Kawakubo alimentan unha proposta visual que posiciona o monstruo como figura crítica dentro da linguaxe do deseño. O corpo, neste contexto, transfórmase nun soporte expandido no que a materialidade e a forma articulan un discurso que redefine a súa representación na moda.